તળાજામાં નશામાં ધૂત યુવક ટ્રક પાછળ સુઈ ગયો’ને ડ્રાઇવરે રિવર્સ લેતા ચગદાયો મૃતકના ખિસ્સામાંથી મળી દારૂની પોટલી : દારૂના વ્યસને વધુ એકનો ભોગ લીધો

તળાજા, તા.5: તળાજામાં પરપ્રાંતમાંથી પેટીયું રડવા આવેલો યુવક દારૂના નશામાં ટ્રકના પાછળના ટાયર પાછળ સુઈ ગયો હતો. નશામા એટલો ધૂત હતો કે ટ્રક ચાલુ થયો તે પણ તેને ખબર ન હતી અને ડ્રાઈવરે રીવર્સ લેતા તેનું મૃત્યુ નીપજ્યું હતું. 

તળાજામાં આગ્રા જિલ્લામાંથી લાદી ટાઈલ્સ ચોંટાડવાની મજૂરી કામે અનિલ રામકીશન નામનો યુવાન આવ્યો હતો. આ યુવાન બપોરના સમયે આશાપુરા હોટલના મેદાનમાં પાર્ક કરેલા  ડમ્પર ટ્રકના પાછળના ટાયર પાસે સુઈ ગયો હતો. ડમ્પરના ચાલકે રિવર્સ લેતા ચગદાઇ જતા યુવાનનું ઘટના સ્થળે જ મૃત્યુ નીપજ્યું હતું. પોલીસ જ્યારે સ્થળ પર પહોંચી ત્યારે ખિસ્સામાંથી દારૂની કોથળી મળી આવી હતી.