ટ્રમ્પની મૂંઝવણ...‘િમત્ર’ ગુમ, ‘શત્રુ’ની મહેમાનગતિ

ફૂટબોલ ફાઇનલમાં સ્પેનના પીએમની હાજરી, આર્જેન્ટિનાના રાષ્ટ્રપતિ વિચિત્ર કારણથી આવ્યા નહીં

ન્યૂયોર્ક, તા. 19 ઃ ફૂટબોલ વર્લ્ડકપની ફાઇનલમાં યજમાન દેશના રાષ્ટ્રપતિ ડોનાલ્ડ ટ્રમ્પે એવા નેતાનું મનોરંજન કરવું પડયું જે વૈશ્વિક મંચ પર તેમના સૌથી મોટા અને સૌથી કટ્ટર ટીકાકારોમાંના એક માનવામાં આવે છે. ભાગ્યનો ખેલ કેવો કે ટ્રમ્પના ખાસ મિત્ર અને પ્રશંસક એવા આર્જેન્ટિનાના રાષ્ટ્રપતિ ઝેવિયર મિલેઇએ આ ઐતિહાસિક પ્રસંગ માટે ન્યૂયોર્ક આવવાનો ઇન્કાર કર્યો !

સ્પેને ફાઇનલ માટે કવોલિફાય કર્યું છે, જેના કારણે સ્પેનના વડાપ્રધાન પેડ્રો સાંચેઝ તેમની ટીમને ઉત્સાહિત કરવા માટે વ્યક્તિગત રીતે ન્યૂયોર્ક પહેંચ્યા. રાજા ફેલિપ છઠ્ઠા, રાણી લેટીઝિયા અને તેમની પુત્રીઓ હાજર રહી. સાંચેઝ ટ્રમ્પની નીતિઓની ખુલ્લેઆમ ટીકા કરવા માટે જાણીતા છે. પછી ભલે તે ઇરાન સાથે યુદ્ધ જેવી પરિસ્થિતિ પર અમેરિકાનું વલણ હોય, ગાઝામાં ઇઝરાયલી લશ્કરી કાર્યવાહી માટે અમેરિકાના સમર્થનનો વિરોધ હોય કે નાટો ખર્ચ અંગેના વિવાદો હોય, બંને નેતાઓ વારંવાર ટકરાયા છે. તાજેતરની નાટો સમિટ દરમ્યાન ટ્રમ્પે સ્પેનને નાટોમાં વિશ્વાસઘાત ભાગીદાર દેશ પણ ગણાવ્યો હતો.

બીજી તરફ મિલેઇ પશ્ચિમી વિશ્વમાં ડોનાલ્ડ ટ્રમ્પના મોટા ચાહક અને નજીકના મિત્ર માનવામાં આવે છે. મિલેઈએ ન્યૂયોર્ક આવવાનો સ્પષ્ટ ઇન્કાર કર્યો હતો.

તેમની ગેરહાજરીનું કારણ કોઇ રાજદ્વારી પ્રતિબદ્ધતા નથી, પરંતુ ફૂટબોલ વિશેની એક ઊંડી અને વિચિત્ર અંધશ્રદ્ધા છે, જેને આર્જેન્ટિનામાં ‘કાબાલાસ’ તરીકે ઓળખવામાં આવે છે.

મિલેઇ કહે છે કે, ઘરેથી મેચ જોવી એ આર્જેન્ટિનાની ટીમ માટે લકી ચાર્મ સાબિત થઇ રહી છે.