ટીમ ઇન્ડિયા જુલાઇમાં ઝિમ્બાબ્વે પ્રવાસમાં 3 મેચની T-20 શ્રેણી રમશે

મુંબઈ, તા.1: આઇપીએલની સમાપ્તિ પછી ટીમ ઇન્ડિયા ઝિમ્બાબ્વેના ટૂંકા પ્રવાસે જશે. આ પ્રવાસ જુલાઇના અંતિમ સપ્તાહમાં હશે. ભારતીય ટીમ ઝિમ્બાબ્વે વિરુદ્ધ 3 મેચની ટી-20 શ્રેણી રમશે. આ ત્રણેય મેચ હરારેમાં રમાશે. શ્રેણીના ત્રણ મેચ અનુક્રમે 23, 2પ અને 26 જુલાઇએ રમાશે. આમ ચાર દિવસમાં ત્રણ મેચની ટક્કર જોવા મળશે. અત્રે એ ઉલ્લેખનિય રહેશે કે ઝિમ્બાબ્વે સામેની શ્રેણી અગાઉ ભારતીય ટીમ આયરલેન્ડ સામે બે અને ઇંગ્લેન્ડ વિરુદ્ધ પાંચ મેચની ટી-20 શ્રેણી રમશે.

ભારતીય ટીમે ઝિમ્બાબ્વેનો આખરી પ્રવાસ 2024 જુલાઇમાં કર્યો હતો. એ વખતે પાંચ મેચની ટી-20 શ્રેણી રમાઈ હતી. પહેલા મેચમાં હાર સહન કર્યા પછી શુભમન ગિલની ટીમનો 4-1થી શ્રેણી વિજય થયો હતો. આવતા વર્ષે 2027 જાન્યુઆરીમાં ઝિમ્બાબ્વે ટીમ ભારત પ્રવાસે આવશે અને 3 વન ડેની શ્રેણી કોલકતા, હૈદરાબાદ અને મુંબઈમાં રમશે.