AIPEિ ફેડરલ એક્ઝિક્યુટિવ દ્વારા આંદોલનનું એલાન
(ફૂલછાબ
ન્યૂઝ)
રાજકોટ,
તા. 9 : ઓલ ઇન્ડિયા પાવર એન્જિનિયર્સ ફેડરેશન (AIPEF)ની ફેડરલ એક્ઝિક્યુટિવની બેઠક
તા. 08 માર્ચના રોજ દેહરાદૂન ખાતે મળી હતી. આ બેઠકમાં ભારત સરકાર દ્વારા ચાલુ બજેટ
સત્ર દરમિયાન સંસદમાં ઇલેક્ટ્રિસિટી એમેન્ડમેન્ટ બિલ 2025 રજૂ કરવા અને પસાર કરવાના
અહેવાલો પર ગંભીર ચિંતા અને ઉગ્ર રોષ વ્યક્ત કરવામાં આવ્યો હતો.
AIPEFના
ચેરમેન શૈલેન્દ્ર દુબે અને સેક્રેટરી જનરલ પી. રત્નાકર રાવે બેઠકમાં જણાવ્યું હતું
કે, વીજ કર્મચારીઓ, એન્જિનિયરો, ખેડૂત સંગઠનો અને ગ્રાહક જૂથો સહિતના હિતધારકો દ્વારા
મોટા પાયે વાંધાઓ રજૂ કરવા છતાં સરકાર યોગ્ય ચર્ચા અને લોકશાહી પરામર્શ વિના આ બિલને
આગળ ધપાવી રહી હોય તેમ જણાય છે.
બેઠકમાં વીજ ક્ષેત્રમાં ખાનગીકરણ માટેના આક્રમક પ્રયાસો
અંગે પણ ગંભીર ચિંતા વ્યક્ત કરવામાં આવી હતી. વિતરણ કંપનીઓના (DISCOMs) ખાનગીકરણને
પ્રોત્સાહન આપવા માટે રાજ્યોને અપાતી કેન્દ્રીય નાણાકીય સહાયને ઇક્વિટી પ્રાઇવેટાઇઝેશન,
ખાનગી કંપનીઓને મેનેજમેન્ટ કન્ટ્રોલ સોંપવા અને ડિસ્કોમને સ્ટોક એક્સચેન્જમાં લિસ્ટ
કરવા જેવી શરતો સાથે જોડવામાં આવી રહી છે. AIPEFએ આ પગલાંને ખાનગીકરણ માટે દબાણ કરવાના જબરદસ્તીભર્યા પ્રયાસો ગણાવ્યા હતા.
ફેડરલ
એક્ઝિક્યુટિવે દેશભરના વીજ ક્ષેત્રના કર્મચારીઓ અને એન્જિનિયરો માટે જૂની પેન્શન યોજના
પુન:સ્થાપિત કરવાની તેની માગણી પણ દોહરાવી હતી. આ તમામ ઘટનાક્રમોને ધ્યાનમાં રાખીને,
AIPEFએ 10 માર્ચ, 2026ના રોજ દેશવ્યાપી આકસ્મિક આંદોલનનું આહવાન કર્યું છે. જો સરકાર
સંસદમાં ઇલેક્ટ્રિસિટી (એમેન્ડમેન્ટ) બિલ રજૂ કરવાની કાર્યવાહી આગળ વધારશે, તો દેશભરના
પાવર એન્જિનિયરો અને કર્મચારીઓ કામનો બહિષ્કાર કરશે અને કચેરીઓ તેમજ પ્રોજેક્ટ સાઇટ્સની
બહાર વિશાળ પ્રદર્શનો યોજશે.
