POKમાં સેના મોકલાશે તો બાહ્ય આક્રમણ ગણાશે ઃ JAAC

-પાક. કબજાગ્રસ્ત કાશ્મીરમાં ઘર્ષણ તીવ્ર બનવાનાં ભણકારા ઃ સુરક્ષાદળોની તૈનાતી સામે ખુલ્લી ચેતવણી

નવી દિલ્હી, તા.29ઃ પાકિસ્તાનના ગેરકાયદેસર કબજા હેઠળના કાશ્મીર (પીઓકે)માં છેલ્લા કેટલાક મહિનાઓથી ચાલી રહેલા આંદોલન વચ્ચે જમ્મુ-કાશ્મીર જોઈન્ટ અવામી એક્શન કમિટી (જેએએસી)એ પાકિસ્તાનને કડક અને સ્પષ્ટ શબ્દોમાં ચેતવણી આપી છે કે, પ્રદેશમાં સુરક્ષા દળોની કોઈપણ નવી તૈનાતીને ત્યાંના લોકો પર બાહ્ય હુમલા તરીકે જોવામાં આવશે. એક્શન કમિટીના નેતા ઉમર નઝીર કાશ્મીરીએ દાવો કર્યો છે કે, કોટલી અને આસપાસના કેટલાક વિસ્તારોમાંથી પાકિસ્તાની સુરક્ષા દળના કેટલાક જવાનો પહેલેથી જ પાછા હટી ગયા છે. તેમણે સ્પષ્ટ કહ્યું હતું કે જો આ જવાનોને ફરીથી ત્યાં મોકલવામાં આવશે તો લોકો તેને સહન નહીં કરે. આવું કોઈપણ પગલું વિસ્તાર પર બહારથી કરવામાં આવેલો હુમલો માનવામાં આવશે અને તેનો કડક વિરોધ કરવામાં આવશે. તેમણે એમ પણ કહ્યું કે સમિતિ માત્ર એક જિલ્લા અથવા એક સ્થળે સુરક્ષા દળોની તૈનાતીનો વિરોધ કરી રહી નથી. તેમનો મત છે કે કોઈપણ જિલ્લામાંથી, કોઈપણ સ્થળેથી અને કોઈપણ પ્રકારના સુરક્ષા દળોને પીઓકેમાં ફરીથી લાવવાનો પ્રયાસ ન થવો જોઈએ.

આ ચેતવણી અચાનક આવી નથી. પીઓકેમાં જેએએસી છેલ્લા કેટલાક મહિનાઓથી આર્થિક, રાજકીય અને બંધારણીય માંગણીઓને લઈને આંદોલન ચલાવી રહી છે. સમિતિએ બંધ, રેલીઓ અને વિરોધ પ્રદર્શનોનું આયોજન કર્યું છે. તેમની માંગણીઓમાં સબસિડી, વધુ સારી શાસન વ્યવસ્થા અને રાજકીય પ્રતિનિધિત્વનો સમાવેશ થાય છે.

આંદોલનની એક મોટી માંગ એ પણ છે કે પાકિસ્તાનના અન્ય વિસ્તારોમાં રહેતા જમ્મુ-કાશ્મીરના શરણાર્થીઓ માટે આઝાદ જમ્મુ-કાશ્મીર વિધાનસભામાં અનામત રાખવામાં આવેલી 12 બેઠકો નાબૂદ કરવામાં આવે. આંદોલનકારીઓનું કહેવું છે કે આ બેઠકો સ્થાનિક લોકોના અધિકારો અને પ્રતિનિધિત્વને અસર કરે છે. જૂન બાદથી આંદોલન વધુ ઉગ્ર બન્યું છે. મુઝફ્ફરાબાદ, રાવલકોટ, મીરપુર અને કોટલી જેવા વિસ્તારોમાં મોટા પાયે વિરોધ પ્રદર્શનો થયા હતા. અનેક સ્થળોએ પ્રદર્શનકારીઓ અને સુરક્ષા દળો વચ્ચે અથડામણના અહેવાલો પણ આવ્યા હતા. હિંસા અને જાનહાનિ અંગે સરકારી અધિકારીઓ અને આંદોલનના નેતાઓના નિવેદનો અલગ-અલગ રહ્યા છે.

આ ઘટનાઓ બાદ આઝાદ જમ્મુ-કાશ્મીર સરકારે જેએએસી પર પ્રતિબંધ મૂકી દીધો હતો. કેટલાક નેતાઓ વિરુદ્ધ કાનૂની કાર્યવાહી પણ શરૂ કરવામાં આવી હતી. અધિકારીઓનો આરોપ છે કે સંગઠને કાયદો અને વ્યવસ્થાની સ્થિતિ બગાડી અને સુરક્ષાકર્મીઓને નિશાન બનાવ્યા હતા.