મોરબી, તા.13: માળીયા મીયાણા પોલીસ મથકના કોન્સ્ટેબલ એક વ્યક્તિને ખોટા કેસમાં ફીટ નહીં કરવાના બદલામાં રૂપિયા એક લાખની લાંચ માંગતા, લાંચ નહીં આપવા ઈચ્છતા જાગૃત વ્યક્તિએ સુરેન્દ્રનગર એસીબીને જાણ કરતા એસીબી ટીમે ભીમસર ચોકડી નજીક છટકું ગોઠવી એક વચેટિયાને પોલીસ કોન્સ્ટેબલ વતી રૂપિયાની લાંચ લેતા ઝડપી લીધો હતો. જો કે, આ કેસમાં લાંચિયો પોલીસ કોન્સ્ટેબલ ફરાર થઈ ગયો હોવાનું સામે આવ્યું છે.
પ્રાપ્ત વિગતો મુજબ માળીયા મિયાણા
તાલુકામાં રહેતા એક વ્યક્તિને ખોટા કેસમાં ફીટ નહીં કરવાના બદલામાં માળીયા મિયાણા પોલીસ
મથકના કોન્સ્ટેબલ રાયમલભાઈ નાનજીભાઈ શિયાળ દ્વારા એક લાખની લાંચ માંગવામાં આવી હતી.
જો કે, અરજદાર ફરિયાદી લાંચ આપવા માગતા ન હોવાથી લાંચ અંગે સુરેન્દ્રનગર એસીબી ટીમને
ફરિયાદ કરતા એસીબી ટીમે ભીમસર ચોકડી નજીક છટકુ ગોઠવતા કોન્સ્ટેબલ રાયમલભાઈએ લાંચની
રકમ ગુલામરસુલ હૈદરભાઈ જામ નામના વ્યક્તિને આપવા જણાવતા એસીબી ટીમની હાજરીમાં આરોપી
ગુલામરસુલ એક લાખની લાંચની રકમ સ્વીકારતા રંગે હાથ ઝડપાઈ ગયો હતો. લાંચનું આ છટકુ રાજકોટ
એસીબીના ઈન્ચાર્જ મદદનીશ નિયામક કે.એચ.ગોહીલના સુપરવિઝન હેઠળ સુરેન્દ્રનગર એસીબી પીઆઈ
એમ.એમ.લાલીવાલા અને તેમની ટીમે સફળતાપૂર્વક ઓપરેશન પાર પાડયું હતું.
