સંબંધોને પાટે ચડાવવા વધુ એક ડગલું આગળ વધતા ભારત-ચીન

સીમાએ શાંતિ અને સ્થિરતા હશે તો જ સંબંધ સામાન્ય બનશે ઃ બન્ને દેશ સહમત

નવીદિલ્હી, તા.28ઃ પૂર્વ લદ્દાખમાં વાસ્તવિક નિયંત્રણ રેખા(એલએસી) ઉપરની સ્થિતિ અંગે ભારત અને ચીન વચ્ચે કૂટનીતિનાં સ્તરે એક મહત્વની પ્રગતિ થઈ છે. બુધવારે ચીનની રાજધાની બીજિંગમાં બન્ને દેશનાં પરામર્શ અને સંકલન માટેની સમિતિની એક બેઠક યોજાઈ હતી. ભારતનાં વિદેશ મંત્રાલયે આ વાતચીત રચનાત્મક રહી હોવાનું જણાવ્યું છે. આ બેઠકમાં બન્ને પક્ષ તરફથી એ બાબતે ભાર મૂકવામાં આવ્યો હતો કે, સરહદે શાંતિ અને સ્થિરતા જ સમગ્ર સંબંધોને સામાન્ય બનાવવાનો માર્ગ ખોલી શકશે.

વર્ષ 2020માં ગલવાન ઘાટીમાં થયેલી હિંસક અથડામણનાં પગલે બન્ને એશિયન મહાસત્તા વચ્ચે તનાવ પેદા થયેલો છે. આ સૈન્ય મડાગાંઠ આશરે ચાર વર્ષ સુધી ચાલી અને છેલ્લે ગયા વર્ષે બન્ને દેશોએ સંબંધોને ફરીથી પાટે ચડાવવા માટે અનેક પગલા લીધા હતાં.

બીજિંગમાં યોજાયેલી બેઠકમાં બન્ને દેશોએ ચીનમાં યોજાનારી વિશેષ પ્રતિનિધિઓની બેઠક માટે નક્કર તૈયારી માટે સહમતી દર્શાવી છે.