વઢવાણ, તા.14 : સુરેન્દ્રનગર શહેરમાં એક ગંભીર અકસ્માત સર્જાયો છે. શહેરના ઉપસના સર્કલથી ભક્તિનંદન સર્કલ નજીક આવેલા દરબાર બોર્ડિંગ નજીક ડમ્પર અને બાઇક વચ્ચે ગોઝારો અકસ્માત સર્જાયો હતો. આ થયેલા અકસ્માતમાં એક યુવકનું ઘટનાસ્થળે જ મૃત્યુ નીપજ્યું છે.
મળતી
માહિતી મુજબ બાઇક પર જઈ રહેલા અક્ષયભાઈ નંદાસણિયાને ડમ્પરે અડફેટે લેતા તેને ગંભીર
ઈજાઓ પહોંચી હતી. અકસ્માત એટલો ભયાનક હતો કે યુવકનું ઘટનાસ્થળે જ મૃત્યુ થયું હતું.
ઘટનાની જાણ થતાં જ બી ડિવિઝન પોલીસનો કાફલો તાત્કાલિક ઘટના સ્થળે પહોંચ્યો હતો. પોલીસે
પરિસ્થિતિ સંભાળી અને મૃતક યુવકના મૃતદેહને પોસ્ટમોર્ટમ અર્થે સુરેન્દ્રનગરની સરકારી
હોસ્પિટલમાં ખસેડવામાં આવ્યો હતો.
આ અકસ્માત
બાદ પોલીસે ડમ્પરચાલકને ઝડપી પાડી તેની ધરપકડ કરી છે. યુવકનાં મૃત્યુથી પરિવારમાં શોક
વ્યાપી ગયો છે.
