નવરાત્રિ, દિવાળીના તહેવારો પહેલા જીએસટીની તપાસને પગલે વેપારીઓમાં ફફડાટ
મોરબી, તા. ર8: નવરાત્રી અને
દિવાળીના તહેવારો નજીક આવી રહ્યા છે ત્યારે મોરબીમાં કરચોરો પર તવાઈ બોલાવવા જીએસટી
વિભાગ એક્શન મોડમાં આવી ગયું છે. આજે વહેલી સવારથી જ મોરબીમાં હાર્ડવેરના વ્યવસાય સાથે
સંકળાયેલા 4 જેટલા મોટા વેપારીઓને ત્યાં જીએસટી વિભાગની ટીમો ત્રાટકી છે અને તપાસનો
ધમધમાટ શરૂ કર્યો છે. જીએસટીની આ મેગા ડ્રાઈવને પગલે મોરબીના વેપારીઓમાં ફફડાટ વ્યાપી
ગયો છે
મોરબીમાં હાર્ડવેરના ધંધાર્થીઓ પર આજે વહેલી સવારથી
જ જીએસટી વિભાગ દ્વારા સર્ચ ઓપરેશન હાથ ધરવામાં આવ્યું છે. જેમાં હિમાલય હાર્ડવેર,
એક્યુરેટ હાર્ડવેર, કલકતા હાર્ડવેર અને સરદાર હાર્ડવેર એમ કુલ 4 હાર્ડવેર પેઢીઓ પર
જીએસટીના અધિકારીઓ દ્વારા સઘન ચાકિંગ હાથ ધરવામાં આવ્યું છે. જીએસટી વિભાગની ટીમો દ્વારા
આ ચારેય સ્થળોએ વેપારીઓના ખરીદ-વેચાણના તમામ દસ્તાવેજો, રોજમેળ અને આર્થિક વ્યવહારોની
ઝીણવટભરી તપાસ કરવામાં આવી રહી છે. ભૌતિક દસ્તાવેજોની સાથે સાથે વેપારીઓના ડિજીટલ પુરાવાઓ
જેવા કે મોબાઈલ અને લેપટોપની પણ ઉલટતપાસ કરવામાં આવી રહી છે.
અત્રે ઉલ્લેખનીય છે કે, તાજેતરમાં
જેતપર ખાતે ચાલતા આંદોલનમાં હાર્ડવેર એસોસિએશનના વેપારીઓ દ્વારા પણ ટેકો જાહેર કરવામાં
આવ્યો હતો. ત્યારે આ દરોડા આંદોલનના ટેકાના પગલે પડયા છે કે પછી રૂટીન તપાસનો ભાગ છે
તે અંગે પણ અનેક તર્કવિતર્કો સર્જાયા છે. જોકે નવરાત્રી અને દિવાળીનો તહેવાર નજીક છે
ત્યારે વિભાગ દ્વારા કરચોરી પકડી પાડવા આ કાર્યવાહી કરવામાં આવી હોવાનું મનાઈ રહ્યું
છે.
