-
અમદાવાદ એરપોર્ટ પર કસ્ટમ્સની
કાર્યવાહી દરમિયાન ટ્રોલી બેગમાંથી 1.928 કિલો નશીલો પદાર્થ મળ્યો
(અમારા પ્રતિનિધિ તરફથી)
અમદાવાદ,
તા.2 : સરદાર વલ્લભભાઈ પટેલ આંતરરાષ્ટ્રીય એરપોર્ટ પર કસ્ટમ્સ વિભાગના એર ઇન્ટેલિજન્સ
યુનિટે મોટી કાર્યવાહી કરી હતી. બેંગકોકથી થાઈ એરવેઝની ફ્લાઇટ નં. ટીજી-343 મારફતે
અમદાવાદ આવેલા એક દંપતી પાસેથી રૂ.1.9 કરોડની અંદાજિત કિંમતનો 1.928 કિલોગ્રામ હાઇડ્રોપોનિક
ગાંજો જપ્ત કરવામાં આવ્યો હતો. આ કેસમાં દંપતીની ધરપકડ કરી વધુ તપાસ હાથ ધરાઈ છે.
એરપોર્ટ
પર થાઈ એરવેઝના મુસાફરોનું પેસેન્જર પ્રોફાઇલિંગ અને એક્સ-રે સ્કાનિંગ કરવામાં આવી
રહ્યું હતું. દરમિયાન એઆઈયુના અધિકારીઓને બે મુસાફરોની હિલચાલ શંકાસ્પદ જણાતા તેમને
અટકાવી સામાનની તપાસ કરવામાં આવી હતી. તપાસ દરમિયાન ટ્રોલી બેગમાંથી વેક્યૂમ-સીલ કરેલા
10 પેકેટ મળી આવ્યા હતા. પેકેટો ખોલીને તપાસ કરતાં કુલ 1,928 ગ્રામ ઉચ્ચ ગુણવત્તાનો
હાઇડ્રોપોનિક ગાંજો મળી આવ્યો હતો. કસ્ટમ્સ વિભાગે એનડીપીએસ એક્ટ, 1985 હેઠળ આ જથ્થો
જપ્ત કર્યો છે. દંપતી આ નશીલો જથ્થો ક્યાંથી લાવ્યું હતું અને દાણચોરીના નેટવર્કમાં
અન્ય કોણ સંડોવાયેલું છે તે અંગે કસ્ટમ્સ વિભાગે તપાસ શરૂ કરી છે.
