બેન્કો રવિવારે પણ ખુલ્લી રહેશે

નવી દિલ્હી, તા. 23 : આ મહિનાની 28થી 30 સપ્ટેમ્બર દરમિયાન 3 દિવસની સંભવિત હડતાળને ધ્યાનમાં રાખીને રવિવારે પણ દેશભરમાં બેંકો ખુલ્લી રાખવાનો મહત્ત્વપૂર્ણ નિર્ણય લેવામાં આવ્યો છે. નાણા મંત્રાલયે જણાવ્યું છે કે, સોમવારથી શરૂ થતી બેંકોની હડતાળ પહેલાં રવિવારે બેંકોમાં રજા રહેશે નહીં. એસબીઆઈ, પીએનબી, યુનિયન બેંક, ઇન્ડિયન બેંક, બેંક ઓફ બરોડા, કેનરા બેંક સહિત પબ્લિક સેક્ટરની તમામ બેંકો અને ક્ષેત્રીય ગ્રામીણ બેંકો પણ ખુલ્લી રહેશે.

તમામ બેંકોમાં સામાન્ય દિવસોની જેમ જ નિયમિત કામકાજ ચાલુ રહેશે. કેન્દ્રીય બેંક અને બેંક રેગ્યુલેટર આરબીઆઈ દ્વારા પણ આ નિર્ણયને મંજૂરી આપવામાં આવી છે. રિઝર્વ બેંકના જણાવ્યા મુજબ, ગ્રાહકોની સુવિધા અને હિતોને ધ્યાનમાં રાખીને આ ખાસ પગલું ભરવામાં આવ્યું છે.

યુનાઇટેડ ફોરમ ઓફ બેંક યુનિયન્સ  દ્વારા 28થી 30 સપ્ટેમ્બર, 2026 દરમિયાન ત્રણ દિવસની દેશવ્યાપી બેંક હડતાળનું એલાન કરવામાં આવ્યું છે. આ અગાઉ 26 અને 27 સપ્ટેમ્બરે વીકેન્ડની રજાઓ પણ આવે છે. આવી સ્થિતિમાં સામાન્ય નાગરિકોની બાંકિંગ જરૂરિયાતો ગંભીર રીતે પ્રભાવિત થઈ શકે છે, જેને ધ્યાનમાં રાખીને સરકારે આ આગોતરી તૈયારી કરી છે.

નાણા મંત્રાલયે સ્પષ્ટ કર્યું છે કે, સામાન્ય લોકોની બાંકિંગ જરૂરિયાતો લાંબા સમય સુધી પ્રભાવિત ન થાય તે માટે તમામ જાહેર ક્ષેત્રની બેંકો અને પ્રાદેશિક ગ્રામીણ બેંકો રવિવાર, 27 સપ્ટેમ્બર, 2026ના  સામાન્ય રીતે કાર્યરત રહેશે. રિઝર્વ બેંક ઓફ ઇન્ડિયાએ તમામ બેંક શાખાઓ, કાર્યાલયો, એટીએમ-લિંક્ડ શાખાઓ અને કરન્સી ચેસ્ટને 27 સપ્ટેમ્બરે સંપૂર્ણપણે ચાલુ રાખવાની મંજૂરી આપી દીધી છે.

સરકાર અને બેંક મેનેજમેન્ટે યુનિયનોને પ્રસ્તાવિત હડતાળ પાછી ખેંચી લેવા અથવા ટાળવા માટે અપીલ કરી છે. સાથે જ, ગ્રાહકોને કોઈપણ પ્રકારની અસુવિધા ન પડે અને જરૂરી બાંકિંગ સેવાઓ નિર્વિઘ્ન ચાલુ રહે તે માટે તમામ આવશ્યક પગલાં લેવામાં આવ્યાં છે.