ટ્રમ્પના ગોલ્ફ ક્લબ ઉપર નો ફલાઈ ઝોનમાં નાગરિક વિમાન ઘૂસી આવતા દોડધામ
વોશિંગ્ટન, તા. 6 : અમેરિકાના
રાષ્ટ્રપતિ ડોનાલ્ડ ટ્રમ્પની સુરક્ષામાં ભારે ચૂકનો બનાવ સામે આવ્યો છે. અમેરિકી વાયુ
રક્ષા એજન્સી નોર્થ અમેરિકી એરોસ્પેસ ડિફેન્સ કમાન્ડે શનિવારે એક નાગરિક વિમાનને એફ-16
ફાઈટર જેટની મદદથી ઈન્ટરસેપ્ટ કરવામાં આવ્યું હતું. આ વિમાન રાષ્ટ્રપતિ ડોનાલ્ડ ટ્રમ્પના
બેડમિંસ્ટર સ્થિત ગોલ્ફ ક્લબ ઉપર ઉડાન ભરી રહ્યું હતું. જે તે સમયે અસ્થાયી નો ફલાઈ
ઝોન ઘોષિત કરવામાં આવ્યું હતું. એરોસ્પેસ ડિફેન્સ એજન્સીના કહેવા પ્રમાણે આ દિવસભરમાં
પાંચમી ઘૂસણખોરી હતી.
ઈન્ટરસેપ્ટ દરમિયાન એફ-16એ હેડબટ
રણનીતિ અપનાવી હતી. જેમાં યુદ્ધ વિમાન નાગરિક વિમાનની આગળ ઉડે છે જેથી તેના તરફ ધ્યાન
આકર્ષિત થઈ શકે. ત્યારબાદ વિમાનને સુરક્ષિત રીતે નો-ફલાઈ જોનમાંથી બહાર કરવામાં આવ્યું
હતું. વર્તમાન સમયે ટ્રમ્પ રજા માણવા ન્યુ જર્સીમાં છે. તેમની હાજરીના કારણે ક્ષેત્રને
અસ્થાયી નો ફલાઈટ ઝોન જાહેર કરવામાં આવ્યું હતું. આ પહેલા માર્ચ મહિનામાં પણ ફલોરીડામાં
ટ્રમ્પના અવાસે નો ફલાઈ ઝોનનું ઉલ્લંઘન થયું હતું.
