રૂ.10 હજારની લાંચ સ્વીકારતા સીબીઆઈના છટકામાં રંગેહાથ ઝડપાયા હતા
અમદાવાદ, તા.21 : અમદાવાદના આવકવેરા
અધિકારી (ઓએસડી) જરનૈલ બી. સિંહને લાંચના કેસમાં અમદાવાદની સીબીઆઈ કોર્ટે ત્રણ વર્ષની
સખત કેદની સજા ફટકારી છે. કોર્ટે આરોપીને રૂ.20 હજારનો દંડ પણ કર્યો છે.
સીબીઆઈએ 22 ફેબ્રુઆરી, 2013ના
રોજ આ કેસ નોંધ્યો હતો. આરોપ મુજબ, જરનૈલ બી. સિંહે ‘શ્રીલેખા વિવિધલક્ષ્મી ચેરિટેબલ
ટ્રસ્ટ’ને આવકવેરા કાયદાની કલમ 11 અને 80જી હેઠળ પ્રમાણપત્ર આપવા તથા કરમુક્તિનો લાભ
અપાવવા માટે ફરિયાદી પાસેથી રૂ.10 હજારની લાંચ માગી હતી. ફરિયાદ મળ્યા બાદ સીબીઆઈએ
છટકું ગોઠવ્યું હતું. આ દરમિયાન અધિકારી ફરિયાદી પાસેથી રૂ.10 હજારની લાંચ સ્વીકારતા
રંગેહાથ ઝડપાઈ ગયા હતા. ત્યારબાદ 22 ફેબ્રુઆરી, 2013ના રોજ તેમની ધરપકડ કરવામાં આવી
હતી. તપાસ પૂર્ણ થયા બાદ સીબીઆઈએ 31 ઓક્ટોબર, 2013ના રોજ કોર્ટમાં ચાર્જશીટ દાખલ કરી
હતી. કેસની સુનાવણી અને પુરાવાઓની ચકાસણી બાદ કોર્ટે 21 ઓગસ્ટ, 2026ના રોજ આરોપીને
દોષિત ઠેરવ્યા હતા. ત્યારબાદ કોર્ટે ત્રણ વર્ષની સખત કેદ અને રૂ.20 હજારના દંડની સજા
સંભળાવી હતી.
