સપ્ટેમ્બરની
શરૂઆતામાં રાજ્યમાં કેટલાંક વિસ્તારોમાં ભારે વરસાદની આગાહી
અમદાવાદ,
તા. 27:
રાજ્યમાં
મોટાભાગના વિસ્તારોમાં છેલ્લાં એક અઠવાડિયાથી ભારે વરસાદ જોવા મળી રહ્યો છે. જોકે,
હવે તહેવારોની શરૂઆત થઈ ચૂકી છે. ગણેશજી બિરાજમાન થઇ ગયા છે અને એક મહિના બાદ નવરાત્રિ
આવશે. એવામાં ખેલૈયાઓ અત્યારથી નવરાત્રિને લઈને તૈયારી કરી રહ્યા છે. પરંતુ, હવામાન
નિષ્ણાતોના અનુસાર, આ વર્ષે નવરાત્રિમાં મેઘરાજા રંગમાં ભંગ પાડવામાં આવી શકે છે. હવામાન
વિભાગની આગાહી અનુસાર આવતીકાલથી 2 સપ્ટેમ્બર સુધી રાજ્યના વિવિધ વિસ્તારોમાં વરસાદની
આગાહી કરવામાં આવી છે. જેમાં આવતીકાલે મહીસાગર, દાહોદ, પંચમહાલ, વડોદરા, ભરૂચ, છોટા
ઉદેપુર, નર્મદા, તાપી ડાંગ, નવસારી, વલસાડ, દમણ અને દાદરા નગર હવેલીમાં ભારે વરસાદની
આગાહી કરવામાં આવી છે. હવામાન નિષ્ણાતોના અનુસાર વરસાદ હજુ ગયો નથી. 30 અૉગસ્ટ અને સપ્ટેમ્બરની શરુઆતમાં રાજ્યમાં કેટલાંક વિસ્તારોમાં
ભારે વરસાદ જોવા મળી શકે છે. બંગાળના ઉપસાગરમાં એક સિસ્ટમ સક્રિય થઈ છે, જેના કારણે
28 અૉગસ્ટે વાતાવરણમાં પલટો આવી શકે છે. આ સમયગાળામાં અરવલ્લી, સાબરકાંઠા અને પંચમહાલના
ભાગોમાં ભારે વરસાદની સંભાવના છે. આ વિસ્તારોમાં ચારથી છ ઇંચ જેટલો વરસાદ વરસી શકે
છે. જોકે, 18થી 30 સપ્ટેમ્બર દરમિયાન બંગાળના
ઉપસાગરમાં હવાનું હળવું દબાણ ઊભું થવાના કારણે નવરાત્રિમાં પણ વરસાદની શક્યતા છે.
