પાકિસ્તાન કનેકશન ધરાવતા અમરેલીના મૌલાનાની ગુજરાત ATS પૂછપરછ કરશે મૌલાના કેટલા સમયથી અહીં રહેતો હતો અને કોણ-કોણ મળવા આવતું સહિતની તપાસ ચાલુ

અમદાવાદ, અમરેલી તા.3 :

જમ્મુ કાશ્મીરના પહેલગામમાં આતંકવાદી હુમલા બાદ સુરક્ષા એજન્સીઓ એક્શન મોડમાં છે. ગુજરાતમાં પણ ગેરકાયદે રહેતા બાંગ્લાદેશી-પાકિસ્તાનીઓ સામે કાર્યવાહી કરવામાં આવી રહી છે. આ વચ્ચે અમરેલી જિલ્લાના ધારીમાં મદરેસાના મૌલાનાનું પાકિસ્તાન કનેક્શન મળી આવતા ભારે દોડધામ મચી ગઇ હતી. મૌલાનાના મોબાઇલમાંથી પાકિસ્તાન અને અફઘાનિસ્તાનના સોશિયલ મીડિયામાં ગ્રુપ મળી આવતાં એસઓજીની ટીમ ચોંકી ઉઠી હતી. આ મામલે ધારી પોલીસ મથકે જાણવાજોગ ફરિયાદ પણ દાખલ કરવામાં આવી છે. ત્યારે અમરેલી સ્પેશિયલ ઓપરેશન્સ ગ્રુપએ મૌલવીને અમદાવાદ  ગુજરાત એટીએસની ઓફિસે લાવવામાં આવ્યો છે જ્યાં પૂછપરછમાં મોટા ખુલાસા થઇ શકે છે.

પ્રાપ્ત માહિતી અનુસાર ધારીના હીમખીમડીપરાના મૌલવી મોહમ્મદ ફઝલ શેખને અમરેલી એસઓજીની ટીમ ગુજરાત એટીએસની ઓફિસે લઇ ગઇ છે. મોબાઇલમાં ટેકનિકલ તપાસ બાદ સૌથી મોટો ઘટસ્ફોટ થવાની શક્યતા છે. મૌલવીના મોબાઇલમાંથી પાકિસ્તાન-અફઘાનિસ્તાન વોટ્સએપ, ટેલિગ્રાફ જેવા ગ્રુપમાં શંકાસ્પદ ભૂમિકા હોવાનું જાણવા મળ્યું છે. સુત્રો અનુસાર મદરેસા ચલાવતા મૌલવીની સામે સ્થાનિક વિસ્તારમાં પણ નારાજગી જોવા મળતી હતી.

અમરેલી એસઓજીને તપાસ દરમિયાન માહિતી મળી હતી કે હિમખીમડીપર વિસ્તારમાં આવેલી મદરેસામાં મૌલાના મોહંમદફઝલ અબ્દુલઅઝીઝ શેખ ગેરકાયદે રીતે વસવાટ કરે છે. જેથી એસઓજીની ટીમે પુરાવા માંગ્યા હતા પરંતુ મૂળ રહેઠાણ અંગે કોઈ પુરાવા ન હોવાથી મૌલનાને પૂછપરછ માટે પોલીસ સ્ટેશન લઈ જવાયો હતો અને હવે વધુ તપાસ માટે અમદાવાદ લવાયો છે. પૂછપરછ દરમિયાન મૌલાના અમદાવાદ શહેરના જુહાપુરાનો રહેવાસી હોવાનું સામે આવ્યું હતું. મૌલાનાનો મોબાઇલ ચકાસતાં પાકિસ્તાન અને અફઘાનિસ્તાનના સોશ્યલ મીડિયામાં ગ્રુપ મળી આવ્યા હતા. જેને લઈને હાલ પોલીસ તપાસ કરી રહી છે કે મૌલાના કેટલા સમયથી અહીં રહેતો હતો અને અત્યાર સુધી અહીં કોણ કોણ આવતું હતું. પાકિસ્તાનમાં કોના કોના સંપર્ક છે તે અંગે તપાસ ચાલી રહી છે.