પહેલી પત્નીના દાગીના બીજી પત્નીએ લઇ લીધા બાદ પરત ન આપી ધમકી આપતી હતી : મહિલાની ધરપકડ
ભુજ, તા.12: ભુજમાંથી એક ચોંકાવનારા સમાચાર સામે આવ્યા છે. જેમાં
એક પત્નીએ પોતાના 60 વર્ષીય પતિને રૂપિયાની લાલચમાં જીવતો સળગાવી દેતા ચકચાર મચી ગઇ
છે. વૃધ્ધને ગંભીર હાલતમાં જી.કે. જનરલ હોસ્પિટલમાં સારવાર હેઠળ ખસેડાયો છે. આ મામલે
માનકુવા પોલીસે વૃધ્ધની પત્ની સામે હત્યાના પ્રયાસ હેઠળ ગુનો દાખલ કરી વધુ તપાસ હાથ
ધરી છે.
મળતી માહિતી મુજબ, ભુજના સામત્રા ગામમાં રહેતા 60 વર્ષીય ધનજીભાઇ પટેલે
પહેલી પત્નીના મૃત્યુ બાદ લગભગ દોઢ વર્ષ પહેલા કૈલાસ નામની યુવતી સાથે બીજા લગ્ન કર્યા
હતા. કૈલાસના પોતાના પહેલાં પતિ સાથે છૂટાછેડા થઇ ગયા હતા. ધનજીભાઇને ત્રણ દીકરા છે
પરંતુ તેમાંથી બે વિદેશમાં છે અને એક પોતાના જ ગામમાં સ્વતંત્ર પોતાના પરિવાર સાથે
રહે છે. ધનજીભાઇ પટેલ અને કૈલાસ બંને એકલા રહેતા હતાં. જો કે, લગ્ન બાદ કૈલાસે ધનજીભાઇ
પટેલની પહેલી પત્નીના અંદાજિત 18 તોલા સોનાના દાગીના લઇ લીધા હતા. આ દાગીનામાં મંગળસૂત્ર,
પાટલા, કંઠી અને વીંટીનો સમાવેશ થાય છે. ધનજી પટેલ જ્યારે આ દાગીના પરત માંગતા તો તે પાછા ન આપી અને ઝઘડા કરતી. આ દરમિયાન કૈલાસે ભુજમાં
પોતાના નામે એક ઘર ખરીદ્યંy હતું, જેના હપ્તા પણ ધનજી પાસેથી લઇ જતી. જો તે કૈલાસને
રૂપિયા આપવાની ના પાડે તો તે જાનથી મારી નાંખવાની ધમકી આપતી હતી. આ વિશે પીડિત કૈલાશે
પોતાના ગામમાં રહેતા દીકરા અને અન્ય એક સામાજિક કાર્યકર સાથે પણ વાત કરી હતી. ગઇ કાલે
સાંજે કૈલાસે ફરી ધનજી પટેલ પાસે પૈસા માંગ્યા. ત્યારે તેણે પૈસા આપવાનો ઇનકાર કરતા
કૈલાસ ઉશ્કેરાઇ અને ‘આજે તો તને જીવતો નહીં મૂકું...’ કહીને કૈલાસે પતિનો હાથ ખેંચીને
ઘરની બાજુમાં આવેલ ગેરેજમાં લઇ ગઇ અને કેરોસીનની બોટલ ખોલીને પતિ ઉપર છાંટી દિવાસળી
ચાંપી દીધી. એક બાજુ પતિ સળગી રહ્યો હતો અને બૂમો પાડતો ત્યાં બીજી બાજુ કૈલાસ ગેરેજના
નાના દરવાજેથી બહાર નીકળી દરવાજો બંધ કરી દીધો હતો.
સમગ્ર ઘટનાની જાણ થતાં ધનજી પટેલનો દીકરો અને અન્ય લોકો ઘટના સ્થળે દોડી
આવ્યા હતા. ત્યાર બાદ તુરંત એમ્બ્યુલન્સ બોલાવવામાં આવી અને તેમને જી.કે. હોસ્પિટલમાં
દાખલ કરવામાં આવ્યા હતા. હોસ્પિટલમાં ડોકટરોએ વૃધ્ધની હાલત ગંભીર હોવાનું જણાવ્યું
હતું.
સૂત્રો પાસેથી મળતી માહિતી મુજબ,
આખી ઘટના વિશે ધનજી પટેલના પુત્રએ માનકુવા પોલીસ સ્ટેશનમાં કૈલાસ સામે ફરિયાદ દાખલ
કરી હતી. પોલીસે ફરિયાદના આધારે આરોપી કૈલાસને ઝડપી લીધી છે અને તેની પૂછપરછ કરી વધુ
તપાસ હાથ ધરી છે.
