પાલિકામાં અગાઉ અનેક રજૂઆતો થઈ હોવા છતાં કોઈ કાર્યવાહી ન થતા અંતે બાળકનો ભોગ લેવાયો
મોરબી,
તા.26 : શહેરમાં નવલખી ફાટક નજીક નાલાની ખુલ્લી કુંડીમાં પડી જતા 6 વર્ષના બાળકનું
કરુણ મૃત્યુ થયું છે. જેને લઈને બાળકના પરિવારમાં કાળો કલ્પાંત છવાયો છે. બીજી તરફ
આ મામલે પોલીસે બનાવની નોંધ કરી આગળની કાર્યવાહી હાથ ધરી છે.
મોરબીના
નવલખી ફાટક પાસે સેન્ટમેરી સ્કૂલના દરવાજા સામે નાલાની ખુલ્લી 8 ફૂટની જીવલેણ કુંડી
છે. આજે સાંજે 5:30 વાગ્યાના અરસામાં નવલખી રોડ લક્ષ્મી નારાયણ સોસાયટીમાં રહેતા પરિવારના
6 વર્ષીય બાળક રવિ સનાભાઈ નાયક કુંડીમાં પડી ગયો હતો. આ કુંડીમાં ગંદુ પાણી અને કચરો
હતો. બાળક કુંડીમાં પડી જતા તેનું કરુણ મૃત્યું નીપજ્યું છે. આ બનાવને પગલે પોલીસે
અકસ્માતે મૃત્યુની નોંધ કરી ધોરણસરની કાર્યવાહી હાથ ધરી છે.
મૃતક
બાળકના પરિવારજને જણાવ્યું કે, અમે માત્ર સામાન ખાલી કરવા ગયા હતા. બાળક ભાગ લેવા ગયો
હતો. પાછો ન આવતા સીસીટીવીમાં જોયું હતું. બાદમાં આ કુંડીમાંથી અમે લાકડા અને સળિયાની
મદદથી બાળકને બહાર કાઢ્યો હતો પણ બાળકનો જીવ બચ્યો નહિ. જો આ કુંડી ઢાકેલી હોત તો બાળક
અમારી વચ્ચે હયાત હોત. ઉલ્લેખનીય છે કે આ ખુલ્લી કુંડીને લઈને પાલિકામાં અગાઉ અનેક
રજૂઆતો થઈ છે પણ કોઈ કાર્યવાહી ન થતા અંતે બાળકનો ભોગ લેવાયો છે.
