અમદાવાદ, તા.25: અમદાવાદમાં હેલ્મેટ
ન પહેરવા બદલ એક યુવકને લાખો રૂપિયાનો દંડ ફટકારવામાં આવ્યો છે. વત્રાલમાં રહેતા અનિલ
હડિયાને 500 રૂપિયાના બદલે 10 લાખ 50 હજાર રૂપિયાનો મેમો આવ્યો હતો. યુવક દ્વારા આ
મામલે પોલીસ કમિશનર કચેરીએ રજૂઆત કરતા હાજર સ્ટાફ દ્વારા યોગ્ય નિરાકરણ લાવી આપવાની
ખાતરી આપવામાં આવી છે.
અમદાવાદના વત્રાલ વિસ્તારમાં
રહેતા 22 વર્ષીય અનિલ હડિયાને સરખેજ શાંતિપુરા સર્કલ ખાતે ટ્રાફિક નિયમ ભંગ બદલ 10
લાખ 50 હજારનો મેમો આવતા પરિવાર ચોંકી ગયો હતો. વકીલાતનો અભ્યાસ કરતો યુવાન ગત વર્ષે
જુલાઈમાં એક્ટિવા પર હેલ્મેટ વગર જતો હતો. આ દરમિયાન ફરજ પર હાજર ટ્રાફિક પોલીસના જવાને
એક્ટિવા ચાલકને રોકીને હેલ્મેટ ના પહેરવા બદલ દંડ ફટકાર્યો હતો. 15 મિનિટના ગાળામાં
જ યુવકના મોબાઈલ પર નિયમભંગનો મેસેજ આવ્યો હતો.
જો કે, ઓઢવ પોલીસ દ્વારા ગત મહિને
પોલીસ ચોકીમાં બોલાવીને કોર્ટમાં જવાનું કહેતા યુવક જ્યારે મેટ્રો કોર્ટમાં જતા તેને
કોર્ટની વેબસાઈટ ચેક કરતા તેમાં નિયમભંગના 10 લાખ 50 હજારનો મેમો જોઈ પરિવાર ચોંકી
ગયો હતો. ગત જુલાઈ મહિનાથી કોર્ટ-કચેરીના અનેક વખત ધક્કા ખાધા બાદ યુવક તેના પિતા સાથે
શાહીબાગ કમિશનર કચેરીએ રજૂઆત કરી હતી. આ ઘટનાને લઈને ટ્રાફિકના ઉચ્ચ અધિકારીએ ટેકનિકલ
સમસ્યા ગણાવી તેને હલ કરવાની બાંયધરી આપી હતી.
