GSTનો મૂળ હેતુ જ માર્યો ગયો: સુપ્રીમ

GSTનો મૂળ હેતુ જ માર્યો ગયો: સુપ્રીમ

સુપ્રીમ કોર્ટની આકરી ટિપ્પણી : સંસદની ઇચ્છા હતી કે, કાયદો નાગરિક અનુકૂળ થાય પરંતુ જે રીતે લાગુ થયો તે અનુચિત
 
નવી દિલ્હી, તા. 7 : દેશમાં ગૂડઝ એન્ડ સર્વિસ ટેક્સ (જીએસટી)ને લઇને સુપ્રીમ કોર્ટે મોટી ટિપ્પણી કરી છે. જીએસટી લાગુ કરવાની રીત પર નારાજગી દર્શાવતાં કોર્ટે કહ્યું કે, સંસદની ઇચ્છા હતી કે જીએસટી-લોકોને અનુકૂળ ‘િસટીઝન ફ્રેન્ડલી’ ટેક્સ થાય. પરંતુ જે રીતે આ દેશભરમાં લાગુ કરવામાં આવી રહ્યું છે એ તેના હેતુને ખતમ કરે છે. ટોચની અદાલતે એમ પણ કહ્યું કે, કરદાતા દરેક ધંધાર્થીને દગાબાજ ન કહી શકે.
હિમાચલ પ્રદેશ જીએસટીની એક જોગવાઇને પડકાર આપતી અરજી પર સુનાવણી દરમ્યાન સુપ્રીમ કોર્ટે આ ટિપ્પણી કરી હતી. સુપ્રીમ કોર્ટના ન્યાયાધીશ ડી. વાય. ચંદ્રચુડે કહ્યું કે, સંસદની ઇચ્છા હતી કે, જીએસટી સિટીઝન ફ્રેન્ડલી ટેક્સ સ્ટ્રકચર બને. પરંતુ જે રીતે તેને દેશભરમાં લાગુ કરવામાં આવે છે તેનો હેતુ ખતમ થઇ રહ્યો છે.
સુપ્રીમ કોર્ટે જીએસટીને લાગુ કરવાની પદ્ધતિ પર નારાજગી વ્યક્ત કરી હતી અને કહ્યું કે, કરદાતા દરેક ધંધાર્થીને દગાબાજ ન કહી શકાય.
 
 
સરકારનું સુપ્રીમ કોર્ટ પર દોષારોપણ !
 
ન્યાયમૂર્તિઓની નિયુક્તિમાં વિલંબ મુદ્દે પલટવાર : સુપ્રીમ, હાઈકોર્ટ પર નિયમભંગનો આરોપ
નવી દિલ્હી, તા. 7 : હાઈકોર્ટના ન્યાયમૂર્તિઓની નિયુક્તિમાં વિલંબ બદલ સુપ્રીમ કોર્ટે કાન આમળ્યા બાદ કેન્દ્ર સરકારે પલટવાર કરતાં દેશની સર્વોચ્ચ અદાલત અને વિવિધ રાજ્યોની વડી અદાલતો પર મેમોરેન્ડમ ઓફ પ્રોઝિર (એમઓપી)ના ઉલ્લંઘનનો આરોપ મૂકી નાખ્યો છે.
એમઓપી હેઠળ કોઈ ન્યાયમૂર્તિનો કાર્યકાળ પૂરો થવાના છ મહિના પહેલાં જ નવા ન્યાયમૂર્તિની નિમણૂકની પ્રક્રિયા શરૂ કરી દેવાતી હોય છે.
આ બંધારણીય અદાલતોમાં ન્યાયમૂર્તિઓની નિયુક્તિ માટે ન્યાયતંત્ર અને સરકારો વચ્ચે એક લેખિત સહમતી હોય છે.
કેન્દ્રીય કાયદા મંત્રાલયમાં ન્યાય વિભાગના સૂત્રોએ એક અહેવાલમાં જણાવ્યું હતું કે, 26 માર્ચ સુધી કુલ 410 ન્યાયમૂર્તિનાં પદ ખાલી હતાં.
ઉચ્ચ અદાલતોએ 214 એટલે કે, બાવન ટકા પદો માટે કોઈ ભલામણ મોકલી  નથી તેવો દાવો સરકાર દ્વારા કરાયો છે.
કાયદામાં મંત્રાલયના જણાવ્યાનુસાર 2018માં દેશની વડી અદાલતોમાં વિક્રમી 618 ન્યાયમૂર્તિ કાર્યરત હતા. 2019માં 677, 2020માં પણ ઘટીને 668ની સંખ્યા થઈ ગઈ હતી.
કાયદા મંત્રાલયે કહ્યું હતું કે, મુખ્ય ન્યાયમૂર્તિ રંજન ગોગોઈ નિવૃત્ત થઈ ગયા ત્યારથી સુપ્રીમ કોર્ટમાં ન્યાયમૂર્તિઓના પાંચ પદ ખાલી થવા છતાં કોલેજિયમે એક પણ નામની ભલામણ કરી નથી.

© 2021 Saurashtra Trust

Developed & Maintain by Webpioneer