કાર વૃક્ષ સાથે અથડાતા પતિ, પત્ની કુમળા પુત્ર સહિત 3નાં મૃત્યુ

કાર વૃક્ષ સાથે અથડાતા પતિ, પત્ની કુમળા પુત્ર સહિત 3નાં મૃત્યુ
 અમરેલીના વેપારીની કારને નાના ભંડારિયા ગામ પાસે અકસ્માત નડયો: કાનપરિયા પરિવારમાં આક્રંદ
અમરેલી, તા.2 (ફૂલછાબ ન્યૂઝ): લગ્ન પ્રસંગમાં જઈ રહેલા અમરેલીના એક વેપારીની કાર અમરેલી નજીક નાના ભંડારિયા ગામ પાસે વૃક્ષ સાથે અથડાતા ગમખ્વાર અકસ્માત થયો હતો. જેમાં કારમાં બેઠેલા વેપારી, તેમના પત્ની અને આઠ માસના માસુમ પુત્ર સહિત ત્રરના ઘટના સ્થળે મૃત્યુ નિપજતા સમગ્ર પંથકમાં ભારે અરેરાટીનો માહોલ છવાયો હતો. આ અકસ્માતમાં યુવાન વેપારીના માતા-પિતાએ એકનો એક પુત્ર, પુત્રવધૂ અને લાકડવાયો દોહિત્ર ગુમાવતા ભારે આક્રંદ વચ્ચે સમગ્ર વાતાવરણ ગમગીન બની ગયું હતું.
પ્રાપ્ત વિગત મુજબ અમરેલી શહેરના ચક્કરગઢ રોડ ઉપર રહેતા અને ખોડીયાર મોબાઈલ નામની દુકાન ધરાવતા ગૌરાંગ મનસુખભાઈ કાનપરીયા (ઉ.વ.38) નામના યુવા વેપારી આજે સવારના આઠેક વાગ્યાના સુમારે પોતાની કાર જીજે14એએ-808 લઈને પત્ની કનકબેન (ઉવ.39) તેમજ પુત્ર મિહિર (ઉવ. 8 માસ) સાથે રામપુર તોરી ગામે લગ્ન પ્રસંગમાં જઈ રહેલ હતા. અમરેલી નજીક કુંકાવાવ રોડ ઉપર નાના ભંડારિયા ગામના પાટિયા પાસે ગૌરાંગભાઈએ કારના સ્ટેરીંગ પરનો કાબુ ગુમાવતા કાર રોડના કાંઠે આવેલા લીમડાના ઝાડ સાથે ધડાકાભેર અથડાઈ હતી. ગમખ્વાર અકસ્માતથી આજુબાજુના ખેતરોમાં કામ કરતા માણસો તેમજ રોડ ઉપરથી પસાર થતાં વાહન ચાલકોએ અકસ્માતગ્રસ્ત કારમાં જોતા પતિ-પત્ની તેમજ માસુમ બાળક બેભાન અવસ્થામાં હતા. ત્રણેયને અમરેલી સિવિલ હોસ્પિટલમાં ખસેડાયેલ હતા. ફરજ પરનાં તબીબે ત્રણેયને મૃત જાહેર કરેલ હતા.
અકસ્માતની ઘટનાની વાત વાયુવેગે ફેલાઈ જતાં મૃતકના પરિવારજનો સહિત વેપારીઓ બહોળી સંખ્યામાં દવાખાને ઉમટી પડેલ હતા. અકસ્માતમાં વૃદ્ધ માતા-પિતાનો એકનો એક જીંદગીનો આધારસ્થંભ છિનવાઈ જતાં પરિવારમાં ભારે આક્રંદ છવાયેલ હતો. યુવા વેપારીના અકસ્માતમાં મૃત્યુથી વેપારી આલમમાં પણ શોકનો માહોલ છવાયેલ હતો. ગમખ્વાર અકસ્માત અંગે રાહુલ પ્રવિણભાઈ હિરપરાએ મૃતક ગૌરાંગભાઈ સામે અમરેલી તાલુકા પોલીસમાં ફરિયાદ નોંધાવેલ હતી.
 
મુખ્યપ્રધાનના ભાઇ-ભાભીની
કારને અકસ્માત નડયો
અમદાવાદ, તા.2: રાજકોટથી અમદાવાદ જતાં મુખ્યપ્રધાન વિજયભાઈ રૂપાણીના ભાઈ, ભાભીની કારને બાવળા- બગોદરા નજીક અકસ્માત નડતાં મુખ્યપ્રધાનનાં ભાભી સહિતના ઇજાગ્રસ્તોને અમદાવાદ હોસ્પિટલમાં ખસેડાયા છે.
પ્રાપ્ત માહિતી અનુસાર, રાજકોટથી અમદાવાદ જઇ રહેલા રૂપાણી પરિવારની કાર બાવળા-બગોદરા હાઇ-વે પરથી પસાર થઇ રહી હતી ત્યારે સામે અમદાવાદથી પાલિતાણા તરફ જઈ રહેલા મુંબઈના પરિવારની કાર સાથે ધડાકાભેર ટકરાઈ હતી. આ અકસ્માતમાં ઇજાગ્રસ્તોને 108 દ્વારા સારવાર માટે બગોદરા હોસ્પિટલમાં ખસેડવામાં આવ્યા હતા. જ્યાંથી વધુ સારવાર માટે અમદાવાદ લઇ જવામાં આવ્યા હતા. જો કે, અકસ્માતમાં મુખ્યપ્રધાનનાં ભાભીને ઇજા પહોંચી હતી જેઓને સારવાર બાદ અમદાવાદ જવા રવાના થયા હતા. મુખ્યપ્રધાનના ભાઈની કારને અકસ્માત થયો હોવાની જાણ થતાં જ પોલીસ તંત્ર સાબદું થયું હતું અને તાત્કાલિક ઘટનાસ્થળે પહોંચી ગયું હતું. આ અકસ્માતમાં સામેની કારના મુસાફરોને વધારે ઇજા પહોંચી હોવાના અહેવાલો છે. આ અકસ્માત બાદ રૂપાણી પરિવાર તાત્કાલિક સારવાર મેળવી અન્ય ખાનગી વાહનમાં અમદાવાદ જવા રવાના થયો હતો. આ ઘટનાની જાણ થતાં બગોદરા પોલીસ તાત્કાલિક ઘટનાસ્થળે પહોંચી હતી અને આગળની કાર્યવાહી હાથ ધરી હતી.

© 2019 Saurashtra Trust

Developed & Maintain by Webpioneer