બોટાદમાં છ વર્ષની માસુમ બાળા પર હેવાનિયત આચરનાર શખસ છ દી’ના અંતે પકડાયો

બોટાદમાં છ વર્ષની માસુમ બાળા પર હેવાનિયત આચરનાર શખસ છ દી’ના અંતે પકડાયો
આ શખસને ઝડપી લેવા 150 અધિકારી અને કર્મચારી કામે લાગ્યાં’તાં

બોટાદ, તા. 5:  બોટાદમાં છ વર્ષની માસુમ બાળા પર હેવાનિયત આચરીને દુષ્કર્મ આચરનાર શખસને છ દિવસના અંતે પોલીસે ઝડપી લીધો હતો. બાળા પર દુષ્કર્મ આચરવા અંગે બોટાદના કુલદીપસિંહ ઉર્ફે અરૂણ રાજુભા પરમાર નામના શખસની ધરપકડ કરવામાં આવી હતી.
બોટાદના ભાંભણ રોડ પર માતાવાડી વિસ્તારના રહેવાસીની છ વર્ષની માસુમ બાળાને પતંગ બનાવી દેવાની લાલચ આપીને લક્ષ્મીનારાયણ પાર્ક-2  પાસેના ખુલ્લા પ્લોટમાં દીવાલ  વાળા કમ્પાઉન્ડમાં લઇ જઇને દુષ્કર્મ કરવામાં આવ્યું હતું. આ અંગે બાળાના પિતાની ફરિયાદ પરથી અજાણ્યા શખસ સામે ગુનો નોંધવામાં આવ્યો હતો. આરોપીને તાકીદે ઝડપી લેવા ભાવનગર રેન્જના આઇજી નરસિમ્હા કોમાર અને જિલ્લા પોલીસ વડા હર્ષદ મહેતાના માર્ગદર્શન હેઠળ ભાવનગર અને સુરતથી સ્કેચ એકસ્પર્ટને બોલાવીને જુદા જુદા બે સ્કેચ તૈયાર કરાવવામાં આવ્યા હતાં. જુદી જુદી  ટીમ બનાવવામાં આવી હતી. રાજકોટ ક્રાઇમ બ્રાંચના પીએસઆઇ આર.સી.કાનમિયા અને સંજય રૂપાપરા, જગમાલ ખટાણાની ટેકનિકલ મદદ લેવામાં આવી હતી. 150 અધિકારી અને કર્મચારી દ્વારા 500 જેટલા લોકોની  પ્રત્યક્ષ અને પરોક્ષ પૂછપરછ કરવામાં આવી હતી. પોલીસની છ દિવસની સઘન તપાસના અંતે શંકાના દાયરામાં આવેલા કુલદીપસિંહ ઉર્ફે અરૂણ રાજુભા પરમારની અટકાયત કરવામાં આવી હતી. તેણે બાળા પર દુષ્કર્મ આચર્યાની કબૂલાત આપી હતી. આ રીતે છ દિવસના અંતે ભેદ ઉકેલાયો હતો.  

© 2019 Saurashtra Trust

Developed & Maintain by Webpioneer